Водич за материјали

Модерната уметност им дава целосна слобода на сликарите, не само во изборот на мотиви, туку и во техниките, материјалите и подлогите што ги користат. Знаеме дека повеќето сликари сепак сакаат проверени и вообичаени носители како платно, картон и евентуално дрво, но зошто да не пробате нешто поинакво, зошто да не експериментирате и можеби да се пронајдете себеси и својата уметност на некоја сосема друга страна? Денес оригиналноста и иновативноста добиваат посебни поени, затоа бидете храбри да се обидете со нешто поинакво.

Хартија и картон како носители на сликата

Сликањето на хартија и картон воопшто не е невообичаено, но во оваа прилика ќе ви ги споменеме и нивните можности. Хартијата и картонот се одлични подлоги доколку сè уште сте во фаза на вежбање или ако станува збор само за експерименти и скици. Освен што можете да купите специјално направена хартија за боење со маслени и акрилни бои, со акрилни бои можете да сликате и на која било подебела хартија без претходна подготовка или откако сте ја премачкале со еден до два слоја акрилен прајмер. Потенките хартии ќе се виткаат за време на нанесувањето и сушењето на боите, па затоа не се препорачуваат.

Картоните исто така ќе ги најдете на пазарот веќе подготвени за сликање со маслени и акрилни бои, тоа се главно сликарски картони со залепено платно и сликата на таква подлога може да изгледа и да биде успешна исто како и сликата на платно поставено на подрамка, особено кога ќе ја врамите. И самите можете да подготвите парче картон и лепенка така што само ќе го премачкате со неколку слоеви прајмер (наизменично од двете страни, за да не се искриви) или со дрволепак прво на него да залепите памучно или ленено платно, а потоа да нанесете прајмер. Во двата случаи платното е погодно како за сликање со акрилни, така и за маслени бои.

Стакло и порцелан

Стаклото и порцеланот не бараат посебна подготовка бидејќи станува збор за стабилни, неапсорбирачки материјали. Најважно е добро да се измијат со детергент и вода, да се пребришат со алкохол за отстранување на евентуалните маснотии за бојата подобро да прилепува или со раствор од оцет и вода да се отстрани бигорот кој може да биде честа појава на стаклените садови. Откако предметот е целосно сув, можете да започнете со сликање со бои за стакло, но и со акрилни или маслени бои доколку предметот ќе биде исклучиво декоративен.

За подобро однесување на акрилните/маслените бои на ваква подлога, можете претходно да ја премачкате со прајмер, а задолжителен чекор по завршувањето е лакирањето кое ќе ја заштити трајноста на обоените слоеви од лупење.

Сликање на ѕид

Осликаните делови од ѕидовите ги нарекуваме мурали. Најчесто ваквите работи се изведуваат со акрилни бои или со бои за ѕидови кои се на водена база. Подготовката зависи од состојбата во која се наоѓа ѕидот, па првиот чекор секако е негова проверка.

Нема да биде добро ако сликањето го започнувате на ѕид кој во себе има влага, ниту на ѕид од кој се лупат старите слоеви боја. Пожелно е ѕидот да има завршен фин слој од глетова маса и да биде чист и варосан, бидејќи на таква подлога сè што ќе нацртате или насликате ќе изгледа многу појасно. Секако, тоа не е неопходно, но имајте предвид дека ќе потрошите многу повеќе боја и многу потешко ќе дојдете до добри резултати на изразено рапав ѕид (освен ако вашата идеја не е токму таква).

Метал и пластика како сликарски подлоги

Можете да сликате и на метални и пластични површини. Во овој случај најпаметно е да избирате акрилни бои, но со соодветни подготовки може да се направи и подлога погодна за работа со маслени бои. И како во случајот со стаклото и порцеланот, првиот чекор е детално чистење, а потоа и отстранување на маснотиите.

Кога на метални или пластични предмети нанесувате прајмер или која било боја, мора да внимавате на тоа колку е мазна, односно сјајна површината. Кај особено мазните површини бојата има тенденција многу лесно да се вади и лупи по сушењето, па затоа треба претходно благо да ја поминете со шмиргла за да стане похрапава и за да има бојата за што да се „фати“.

Стиропор како подлога за осликување и декупаж

Стиропорот почесто се јавува како подлога за декупаж и слични хоби техники, но бидејќи во тие случаи главно се користат акрилни бои и производи на акрилна база, подготовката и правилата за подготовка на овој материјал се во потполност исти и во случај на сликање и во случај на декупаж. Најбитно е да знаете дека на површини од стиропор никако не смеете директно да нанесувате производи на база на растворувачи (кога не сте сигурни, ќе ги препознаете по остриот мирис) - значи, можете да работите директно на стиропорот, но држете се до акрилатите.

Кога сепак имате посериозна идеја која бара и употреба на поинакви бои, најдобро ќе биде преку стиропорот да залепите со помош на дрволепак или лепак за декупаж парчиња потенка хартија, салфетка или весник. По сушењето на таков хартиен слој, искористете прајмер паста за да добиете идеално мазна површина (нанесете ја во неколку тенки слоеви, при што секој слој треба да се изшмиргла пред да се нанесе следниот.). Така подготвениот стиропор е подготвен за осликување со акрилни бои, а со дополнителен премаз со прајмер и за сликање со маслени бои. На овој начин често настануваат делови од телото за театарски кукли поради леснотијата на стиропорот.

Читај понатаму од нашиот блог

• Дали сте пробале дрво како подлога за сликање?
• Како да се избере соодветно сликарско платно?
• 5 најчести заблуди за маслените бои