Техники на сликање

Како се штедат боите за сликање? Како со помалку бои да насликате поголема слика?

Не штедете ги боите, дајте ѝ на својата слика онолку колку што бара, бидејќи само така ќе дојдете до добри резултати. Но, не се расфрлајте со боите!

Затворајте ги тубите со бои

Дали воопшто е потребно да го напишеме ова? Акрилната боја се суши со испарување на водата и ако оставите туба со акрилна боја отворена, за неколку часа бојата во неа повеќе нема да биде течна — ќе се исуши. А откако ќе се исуши, таквата боја е можно да се разреди единствено со ацетон и слични растворувачи. Со други зборови — ќе биде неупотреблива и ќе ја фрлите. Маслената боја се суши многу побавно и ако не ја затворите тубата, веројатно само на врвот бојата ќе се исуши, па кога ќе го извадите тој „чеп од сува боја“, внатре сè ќе биде во ред, но сепак внимавајте.

Внимателно со истиснувањето на бојата

Ставете на палетата онолку боја колку што ви треба за следните половина час работа, ако зборуваме за акрилни бои. Бидејќи на акрилната боја ѝ е потребно приближно толку време за да се исуши, а кога ќе се исуши, повеќе нема да можете да ја користите. Ако зборуваме за маслени бои — можете слободно на палетата да подготвите бои што ќе ги користите во текот на целиот ден. Тоа е една од причините зошто сликарите ги сакаат маслените бои.

Прскајте ги боите на палетата со вода

Многу сликари го користат овој трик за да ја зачуваат свежината на акрилната боја на палетата. Едноставно во прскалка сипете вода и на секои 5–10 минути испрскајте ја палетата. Се разбира, ова важи само во случај ако користите бои што се разредуваат со вода! Во никој случај ако станува збор за маслени бои.

Како да мешате бои?

Кога мешате нова нијанса од неколку бои, секогаш е попаметно во светлата боја да додавате темна, за на крајот на палетата да не остане огромна количина боја што не ви треба. На пример, ако сакате светлосива, не почнувајте да ја правите така што во црната ќе додавате бела, туку обратно.

Зачувајте ја бојата од палетата

Не ги фрлајте измешаните нијанси, туку спакувајте ги во теглички и искористете ги за сликање или барем за подсликување на следната слика. Какви било садови или пластични чаши што можете да ги затворите со проѕирна фолија ќе бидат во ред. Само е важно бојата да не е во допир со воздухот. Проѕирната фолија можете да ја користите и за да ја покриете целата палета кога правите пауза во текот на сликањето.

Читајте понатаму на нашиот блог

• Дали знаете што е теорија на бои — color wheel?
• 12 совети за почетници — како да започнете со сликање со акварел
• Дали може да се слика со водени бои на платно?