Цртање и илустрација

Акварелните моливи се многу слични на обичните моливи и боички. На ист начин ги држите и ракувате со нив, на ист начин ги острите, на ист начин можете да ги избришете. Дури откако ќе додадете вода, се појавува акварелниот ефект. Можете, значи, да ги користите без ефект на водени бои и да имате совршени класични цртежи со моливи или пастели. А ако сакате ефект на водени бои, додадете – вода. Нивните предности се во тоа што полесно се користат, релативно се евтини и по употребата нема хаос што треба да го чистите. Содржат посебно врзивно средство кое се разредува во допир со вода и нему можеме да му се заблагодариме за ефектот на водени бои.

Што се однесува до формите на боите, на располагање ви се во облик на класични дрвени моливи, но и класични пастели со кои можете да цртате како со вообичаените верзии, а потоа да додадете вода ако сакате. Што се однесува до цврстината на дрвените моливи, не постои некоја ознака или критериум, туку таа зависи од самиот производител, па најдобро е да испробате повеќе видови за да видите што вам лично ви одговара. Имајте на ум, колку е моливот помек, толку полесно ќе ја пренесете бојата на хартијата.

Пастелите, како што рековме, исто така се произведуваат со додаток на врзивно средство кое се разредува во допир со вода, така што добивате акварелен ефект. Ако сакате да исполните поголеми површини со боја или да го направите тоа побрзо, пастелите се одлично решение бидејќи се помеки и пошироки од дрвените моливи. Бидејќи овие моливи и пастели се релативно нови на пазарот, обично во нивниот назив е нагласено каков карактер имаат, а неретко производителите ја обележуваат и секоја поединечно така што на горниот дел втиснуваат знак како сликарска четка или капка вода.

Како се користат акварелните моливи?

Користењето е многу едноставно, како кај обичните дрвени моливи или пастели. Ракувате со нив на ист начин, користите исти острилки, а можат и да се избришат на ист начин. Максималниот потенцијал на акварелните моливи можете да го извлечете применувајќи вода на неколку начини:

1. Примена на влажна сликарска четка преку цртежот со молив или пастел – со сликарска четка која сте ја наквасиле со обична чиста вода поминувате преку линиите што сте ги исцртале со молив или пастел. Јачината на нијансата зависи од количината на боја што сте ја пренеле на хартијата. Ако ви е целта што посилна нијанса, нанесете повеќе слоеви боја со моливот. За таа цел можеби ќе ви биде полесно да користите пастели отколку моливи, или моливот да биде потполно тап додека го користите. Применете ја четката селективно, не на сите површини, за да биде подобар ефектот. На крајот, ако ја примените секаде, зошто не сте користеле само водени бои од почетокот.

2. Цртајте на влажна хартија – пред да почнете да цртате со моливи или пастели, навлажнете ја хартијата со сликарска четка во умерени количини. Ќе добиете посебни ефекти, цртежот ќе има многу меки и разлеани рабови. Не претерувајте со количината на вода, и внимавајте моливот да не биде премногу острен, за да не ја продупчи хартијата.

3. Пренесете ја бојата на четката – како кога користите класични водени бои па со врвот на четката собирате боја од палетата, така можете да соберете боја со влажна четка од врвот на моливот или пастелот. Понатаму сликате нормално, како што би со класични водени бои.

4. Навлажнете го врвот на моливот или пастелот пред цртање – допрете го врвот на моливот или пастелот со мокра четка или едноставно со рака благо навлажнете ги и почнете да цртате. Ќе добиете потези со јаки бои кои ќе станат послаби и потенки кога ќе се исушат.

5. Настружете боја од моливот – со помош на нож настружете парчиња од врвот на моливот, посипете ги на влажна хартија или посипете ги на хартија па испрскајте со вода и гледајте како бојата се разлева. Ова е одлична техника за добивање текстура.

Важно е да напоменеме дека не треба да ја прекриете целата површина со вода. по цртањето со моливи или пастели. Суштината на овој прибор е спојот на овие две техники. Ако не сакате да оставите некоја површина сува, можете кога сè ќе се исуши да ги засилите деталите користејќи повторно акварелни моливи и пастели. Наместо класична сликарска четка можете да користите и четки кои наместо дршка имаат резервоар со вода, на тој начин секогаш ќе осигурате дека доволна количина на влага ќе стигне до врвот на четката, а со тоа и до цртежот.

Колку слоеви треба да се нанесат?

Овде правилото не се разликува многу од она кај стандардните дрвени моливи и пастели. Можете во суштина да нанесете колку слоеви сакате. Сепак, имајте на ум дека ако нанесете премногу слоеви, кога преку нив ќе поминете со вода, тоа нема да биде ефект, туку кал. Колку ќе се мешаат боите, зависи од вашите потези. Ако постојано со мокра четка одите напред-назад преку обоената површина премногу пати, водата ќе го растопи целиот пигмент. Меѓутоа, ако сте премногу претпазливи па само со вода ја допрете површината, тоа не е доволно за вистински ефект – на овој начин ќе се раствори само пигментот на врвот.

Ако користите хартија со текстура, оваа карактеристика (тоа дека пигментот се раствора само на врвот) можете максимално да ја свртите во своја корист – пробајте и ќе видите како на овој начин се создаваат посебен ефект и длабочина. Со малку пракса со овие бои ќе ги видите резултатите со свои очи, па ќе ви биде полесно да оцените кои потези се соодветни. Нешто на што можеби не сте навикнати при користењето класични моливи е дека мора да водите сметка врвот на моливот да биде чист и да не содржи траги од други бои. Редовно чистете го со платнена крпа или парче хартија за боите да не се мешаат кога вие тоа не го сакате. Исто така, кога методот што го применувате за да го претворите моливот во водена боја е примена на мокра четка, бидете претпазливи и исперете ја четката помеѓу примената на слоеви од различни бои.

Испробајте во своите креации можностите за спој на две техники. Лесно и брзо ќе стекнете искуство, барем во споредба со други техники, а резултатите сигурно ќе бидат оригинални, Оваа техника нуди многу простор за експериментирање и откривање на нови креативни можности.

Читај понатаму од нашиот блог

• Цртаме со молив: Научи техники на цртање
• Цртеж со молив — совети за почетници и напредни
• Како да научиш цртање — 4 вежби кои делуваат за 30 дена