Водич за материјали

Секој што поминал низ школо за сликање или работилница знае едно: без соодветен алат, нема ни добар резултат. Прво и основно правило: четките се најважниот дел од вашиот прибор и бараат посебна грижа.

Не ги оставај четките во вода

Влакната на четката се прицврстени со лепак и притисок, а обично имаат дрвена лакирана рачка и метален држач за влакната. Ниту на лепилото, ниту на металот, ниту на дрвото не му годи долго стоење во вода. Ако твојата четка помине неколку часа потопена во вода, лакот од рачката ќе почне да се лупи, лепилото ќе попушти и влакната ќе почнат да паѓаат, а металот може да 'рѓоса. Истото важи и за терпентинот, само што тој е растворувач, па штетата ќе настане многу побрзо. Ако од некоја причина мораш да ги оставиш четките во вода или терпентин, нека бидат потопени само влакната, до металниот дел.

Никогаш не ги оставај четките неизмиени

Сосема е во ред ако бојата на четката се исуши по сликање со темпера или акварел. Но, ако маслена боја или акрилна боја се исуши на четката, можеш веднаш да ја фрлиш, бидејќи повеќе нема да можеш да ја испереш. Нашиот совет е: кога немаш време темелно да ги испереш четките, барем отстрани ја бојата од нив со крпа, а потоа завиткај ги во фолија. Така можат да останат неколку часа додека не најдеш време за миење. Секако, постојат средства за чистење, но четката никогаш нема да ја врати првобитната форма и квалитет.

Не ги миј четките со жешка вода

Биди доследен, миј ги четките веднаш по сликањето, но никогаш со жешка вода. Причината е повторно лепилото, кое под влијание на жешката вода омекнува и попушта. Не сакаш влакната да ти паѓаат по целата слика. Користи млака вода и сапун (претходно терпентин, ако станува збор за маслени бои).

По миењето не ги суши со влакната нагоре

Причината? Водата што ќе остане во врвот на четката ќе почне да се слева кон металниот дел и дрвената рачка. Веќе знаеш дека тоа не му годи на ниту еден дел од четката. Најдобро е да исцедиш што е можно повеќе вода од влакната, а потоа да ја поставиш четката на крпа или пешкир и да ја оставиш така да се исуши во хоризонтална положба. Или користи соодветен држач за четки.

Не ги складирај со влакната надолу

Кога четките се измиени и суви, треба да се складираат до следната употреба. Но, не било како! Можеш да ги чуваш во хоризонтална положба или во садови (како што обично правиме), но никогаш така што влакната ќе бидат свртени надолу, секогаш со врвот нагоре. Ако четката лежи со влакната на дното од садот, притисокот трајно ќе ја деформира, особено ако станува збор за нежни природни четки. На овој начин ќе имаш и подобар преглед и полесно ќе ја најдеш четката што ја бараш.