Техники на сликање

Ова е техника која веројатно ќе ве изненади со својата едноставност, техника за која не е неопходно да сте посебно талентирани ниту да имате сликарско искуство, а со чија помош можете брзо да дојдете до неверојатно елегантни и декоративни композиции. Сепак, она што го бара за резултатите да бидат импресивни е многу вежбање, па пожелно е да сте вредни, трпеливи и истрајни доколку сакате да се испробате во овој начин на сликање. Ве заинтересиравме ли?

Називот „One stroke painting“ преведен на нашиот јазик би значел еднопотезно сликање и најважната карактеристика е токму она за што зборува називот — формирање на обликот од повеќе бои, но со само еден потег на четката. Популарноста на овој начин на сликање расте последниве години благодарение на Дона, уметница од Америка, која ја усовршила техниката и со неа ги подучува учесниците на своите работилници, а кои наученото го пренесуваат понатаму, па и на нашите простори може да се наиде на курс за нејзино совладување.

Претпоставка е дека се појавила уште во XVIII век како начин на украсување на мебел и садови, искусната рака на овој начин многу брзо би го насликала предметот, па била погодна за комерцијални цели. За да ја совладате оваа техника можете да посетувате курс, како што споменавме, каде што предавачите ќе ве научат на потезите и правилата со чија помош најлесно и најбрзо ќе дојдете до добри резултати, но сметаме дека до добри резултати можете да дојдете и сами, со вежбање и експериментирање следејќи видеа во кои се демонстрирани основните потези. Во двата случаи ќе ви биде потребен прибор за работа кој треба да содржи неколку соодветни четки, акрилни бои и подебели хартии или сликарски платна, а нешто од тоа сигурно имате дома, па би можело да се каже дека ова не е претерано скапа занимација.

Прибор и материјал кој е потребен

Подлога — За почеток е, секако, најдобро да користите подебели хартии или картони (бели или во боја) додека вашата рака не ги усвои потезите, а подоцна можете да преминете и на сликарско платно на рамка или подготвено платно на картон на кои вашето дело ќе изгледа посериозно и комплетно. Подлогата, исто така, може да биде и дрво, стакло, керамика, пластика па дури и текстил, со тоа што таквите подлоги треба да имаат соодветна подготовка и неопходно е да бидат мазни. Работи како вазни и чаши оставете за подоцна бидејќи за повлекување на овие потези по кружни облици е потребна посебно увежбана рака.

Бои

Во овој случај е најнаједноставно да се работи со акрилни бои, а како што знаете тие се погодни за работа на апсолутно сите подлоги: на хартија, картон, платно и останатите веќе споменати материјали. Вода обично не ви е потребна за разредување на бојата во оваа техника, а не е ни пожелна, па ако процените дека бојата со која работите сепак е премногу густа и остава сува трага по подлогата, можете да користите некој од разредувачите за акрилни бои или слични медиуми. Можете да работите, секако, и со маслени бои или бои специјализирани за стакло или керамика, со тоа што е препорачливо да бидат покривни за да биде ефектот видлив, што, повторно, не значи дека не смеете да експериментирате со транспарентни бои.

Четки

Би можеле да кажеме дека овде сликарските четки се најбитниот дел од приборот — колку повеќе ги имате, толку можностите ви се поголеми. Издвојте од својата колекција оние рамни, со еластични и мазни влакна, не премногу меки како четките за акварел, но никако крути како што се четките од свински влакна кои се користат за маслено сликање. Нека бидат густи за да можат да впијат доволно количество боја и нека бидат сочувани бидејќи распукани влакна не се пожелни.

А и ако ги купувате наменски за оваа техника, бирајте токму такви какви што опишавме и не двоумете се да побарате помош од продавачот или совет од сликарот, бидејќи погрешно избраната четка може да донесе проблеми кои ќе ве наведат брзо да се откажете. Чувајте ги и негувајте ги за да останат еластични и да го задржат обликот бидејќи за еднопотезното сликање тоа се најважните карактеристики на добрата четка. Не е на одмет да споменеме дека ви е потребна и палета на која ќе ги мешате боите и ќе ја „полните четката“, како и сад со вода каде што ќе ги миете четките и салфетка или крпче со кое нежно ќе го бришете вишокот вода од нив пред да земете наредна боја.

Најчесто на овој начин се сликаат мотиви од природата — цветови и листови, со поедноставување и стилизација на формите. На една слика може да биде користена исклучиво еднопотезна техника, но таа може да биде и само како дополнување или во комбинација со други техники на украсување. Кога ќе донесете одлука дека сакате да ја тестирате својата креативност во еднопотезното сликање, пред сè, соберете го потребниот материјал. А кога ќе го совладате начинот на полнење на четката со боја, кој е пресуден за ефектот на меки преливи на нијанси и ефектот на сенка, а потоа ќе ги совладате и основните потези, ви останува добро да ги планирате композициите и да испробате различни комбинации на колорит и подлоги — да се играте и забавувате, со други зборови.