Техники на сликање

Ако сакаш подобро да ги разбереш своите четки – научи ја нивната анатомија! Што, каде и зошто... ајде да почнеме!

Глава на четката

Тука се наоѓаат влакната – најважниот дел што го одредува карактерот на четката. Врвот на четката е делот што ја допира површината на која сликаш. Врвот може да биде остар, заоблен или закосен и, во зависност од тоа, остава различен траг. „Стомакот“ е најширокиот дел од четката, кој ја задржува водата и бојата, а од него зависи и каков траг можеш да создадеш со четката.

Вирола (металниот дел)

Ова е металниот дел што ја поврзува главата со рачката на четката и ги држи влакната цврсто заедно. Квалитетот на четките може да се препознае според типот на влакната, но и според квалитетот на металот од кој е направена виролата, или според тоа колку цврсто се стегнати влакната. Евтините четки најчесто имаат послаб лепак, поради што влакната испаѓаат и нè нервираат бидејќи остануваат насекаде по сликата.

Рачката, односно телото на четката, може да биде дрвена или пластична, кратка или долга, во зависност од техниката за која е наменета четката. Четките што се користат за хоризонтални површини, како акварел и калиграфија, имаат кратка рачка, додека четките за вертикално платно имаат долга рачка бидејќи е потребно поголемо растојание помеѓу платното и раката.

Ознака за големина

Големината е напишана на првиот дел од рачката. Означена е со броеви и се движи од 000 (најтенка), при што големините од 1, 2 па сè до 24 се најчести. За жал, големините не се унифицирани кај сите производители, па на пример, ознаката 10 не мора нужно да значи дека ширината на четката е 10 мм.

Ознака на серијата

По името на производителот, во овој дел најчесто е напишано името на серијата на која ѝ припаѓа четката. Бидејќи големите производители имаат голем број серии, овие информации се исклучително важни за купувачите кои веќе знаат што им одговара и какви четки им се потребни.

Код

Кодот содржи букви и бројки кои во скратена верзија кажуваат за серијата на четката и конкретно за нејзината форма во дадената серија. Кога купуваш четки онлајн, доволно е да го внесеш овој код во пребарувачот на страната и ќе ја најдеш точно таа четка што ја бараш. Како последна напомена, на рачката се наоѓа и информација за земјата каде што е произведена четката.