Техники на сликање

Сакаш да извлечеш максимум од своите четки? Првиот чекор е да ја запознаеш нивната анатомија.

01

Глава на четката

Ова е делот каде што се наоѓаат влакната - најважниот дел кој го одредува карактерот на четката. Врвот на четката е делот што ја допира површината на која сликаш. Може да биде остар, заоблен или закосен, и во зависност од тоа, остава различен траг. „Стомакот“ е најширокиот дел од четката каде што се задржуваат водата и бојата, и од него зависи колку долг потег можеш да направиш.

Држач (ферула)

Ова е металниот дел што ги поврзува главата и рачката на четката и ги држи влакната заедно. Освен што квалитетот на четката го препознаваме според типот на влакната, го препознаваме и според квалитетот на металот од кој е направен држачот, како и според тоа колку цврсто се прицврстени влакната во него. Кај поевтините четки, лепилото често е послабо, па влакната лесно се одвојуваат и остануваат залепени на платното додека сликаш.

02

Рачката, односно телото на четката, може да биде дрвена или пластична, кратка или долга, во зависност од техниката за која е наменета четката. Кратки рачки имаат четките што се користат на хоризонтална подлога, како акварел и калиграфија, а долги рачки имаат четките што се користат на вертикално платно, каде што е потребна поголема оддалеченост на раката од платното.

Ознака за големина

На првиот дел од рачката е напишана големината. Таа се изразува со број и започнува од 000 (најтенка), преку големини 1, 2, па сè до 24. За жал, големините не се исти кај сите производители, па на пример, ознаката 10 не мора да значи дека ширината на четката е точно 10 мм.

03

Ознака на серија

По името на производителот, во овој дел обично е напишано името на серијата на која ѝ припаѓа четката. Бидејќи реномираните брендови нудат многу различни серии, оваа ознака е клучна за уметниците кои веќе знаат кој тип на четка им лежи во рака.

Код

Во кодот се наоѓаат букви и бројки кои во скратена форма ја опишуваат серијата на четката и попрецизно нејзиниот облик. Кога купуваш четки онлајн, доволно е во пребарувачот на страницата да го внесеш овој код и така ќе ја најдеш токму онаа четка што ја бараш. Како последна информација, на рачката се наоѓа и земјата во која е произведена четката.