Техники на сликање

Акварелните маркери креваат голема „прашина“ секогаш кога ќе се појават како нов производ на некој бренд, а во последно време се појавуваат често. Тоа јасно ни кажува дека оние што ги користат се задоволни, бидејќи побарувачката за нив очигледно расте. Можеме да претпоставиме дека она што е специфично и прекрасно кај нив е тој спој на маркерот како прецизна алатка, со акварелен ефект кој е прилично слободен и од кој не се очекува прецизност.

Фломастерите и маркерите секогаш ја имаат таа форма која е исклучително практична и тоа е пред сè она што ги привлекува уметниците кои ги користат — не се сите расположени за нередот што настанува кога се работи со течни бои, четки и четкички. Како средства за цртање, во стандардната варијанта, тие обично не даваат особено големи и богати можности, но овој тип на маркери сепак излегува од тие рамки и ви дозволува да си играте, да експериментирате и да ги користите на многу различни начини.

Алкохолни, акрилни, акварелни маркери — која е воопшто разликата?

Нијанси

Освен што сите тие серии на акварелни маркери имаат голем број нијанси, па уште од почеток можете да ја формирате својата палета на бои и со тоа на своите дела веднаш да им дадете посебен печат, можете да ги надградувате нијансите и да создавате меки и разиграни преливи со повторување на потезите или со работа на влажна хартија, пуштајќи две нијанси да се допрат и да се спојат во некоја сосема нова, а притоа да остане топлиот прелив карактеристичен за акварелот.

Облик

Тврдите и нееластични врвови кај маркерите се добра работа кога ви треба прецизност и сигурност, но таа изедначена линија знае да биде здодевна. Овде тоа е значително поинаку — врвот е прецизен и остар, но сепак еластичен, па ќе ви дозволи со различен притисок врз подлогата да добивате линии со различна дебелина, изедначени и рамни или линии чија дебелина варира. Значи, акварелниот маркер од една страна е маркер, по облик и по тоа што е потребно само да го извадите капачето и да го користите, но неговата друга особина е акварелот, бидејќи трагот што го остава на хартијата (или дури и на подлоги од друг материјал како платно или дрво) е сочен и мек, баш како и трагот што би го оставила четкичка натопена во акварелна боја.

Како се користат акварелните маркери?

На што да цртате и сликате со акварелни маркери? Поради влажниот траг што го оставаат, треба да се внимава на хартијата што се користи во овој случај. Резултатите ќе бидат најдобри на хартии кои се предвидени за работа со акварелни бои, бидејќи тие се доволно дебели за бојата да не пробива на спротивната страна на хартијата и да не се разлева во правец во кој не сакаме, а исто така, на таквите хартии не би имале проблеми во вид на виткање или какво било деформирање ако работите со повеќе вода. Акварелната хартија може да биде со различна грамажа, најчесто се во употреба хартии над 180 g/m². А структурата на хартијата избирајте ја врз основа на вашата идеја и цел: мазни хартии со фина структура, или погруби, ладно пресувани хартии. Погледнете ја нашата понуда на блокови за скицирање.

Можете со нив да работите на влажна хартија — хартијата ја премачкувате со вода од двете страни и почекајте неколку моменти да ја впие водата, а кога на таква хартија ќе повлечете потез, тој ќе се разлева и автоматски ќе добиете фини преливи и посветли нијанси. Меѓутоа, можете да се послужите и со делумно квасење на хартијата и така да го контролирате правецот во кој ќе се разлева трагот (бојата ќе се шири само во рамките на наквасениот регион). Кога работите на сува хартија, искористете мокра четкичка со која свежиот траг од маркерот ќе го „размачкувате“.