Светот на уметноста и инспирација
Што е Операција Ноќна стража и зошто е важна?
Одлична вест за љубителите на уметноста, а особено за оние кои ги ценат делата на Рембрант! Во амстердамскиот „Рајксмузеум“ (Rijksmuseum) се одвива реставрација на „Ноќна стража“, едно од најпознатите дела на овој холандски сликар, кое можеш да го следиш преку пренос во живо на интернет.
Ноќна стража, или попрецизно сликата со наслов Четата на капетанот Франс Банинг Кок и поручникот Вилем ван Рујтенбург се подготвува за излез, е ремек-дело на Рембрант ван Рајн, најголемиот и најпознатиот холандски барокен сликар и графичар. Насликана е со техника на маслена боја на платно во 1642 година и ги прикажува стрелците, односно членовите на стрелачкото друштво, кои воедно биле и нарачатели на ова дело.
Како до тоа?
По деталните студии, кои вклучуваа истражување на сликарските техники, фотографии со висока резолуција и напредна компјутерска анализа, беше создаден прецизен работен план. Самиот проект „Операција Ноќна стража“ нуди и можност јавноста да ги следи работите, бидејќи, како што наведува директорот на „Рајксмузеум“, ова дело им припаѓа на сите што живеат во Холандија, но и на целиот свет, а јавноста има право да види што се случува со него. Сликата е сместена во специјално дизајнирана стаклена комора, така што сè уште може да се види, но истовремено може да се следи сè што се случува околу неа.
Интересни факти:
Сликата го прикажува ентериерот на стрелачката сала во текот на денот, но го добила прекарот „Ноќна стража“ во периодот кога била покриена со потемен лак и навистина изгледала како да е ноќ (темниот лак подоцна бил отстранет, но прекарот останал).
Сликата била скратена за околу 20 % во однос на оригиналната верзија за да се вклопи во новиот простор. Сегашната големина на сликата е 3,6 m × 4,4 m, а првично била 4 m × 5 m.
Со оваа слика, иако станувало збор за негово најамбициозно дело насликано на врвот на неговата кариера, Рембрант ја изгубил популарноста бидејќи не се придржувал до тогаш вообичаениот начин на сликање групни портрети. На сликата не се сите ликови подеднакво видливи, што предизвикало незадоволство кај нарачателот.
Сликата претрпела повеќе „напади“. Двапати посетители ја оштетиле со нож, а во 1990 година еден од посетителите на музејот ја испрскал сликата со киселина. Сепак, обезбедувањето брзо реагирало и на платното веднаш била нанесена вода, што спречило киселината да навлезе во подлабоките слоеви. По оштетувањето, сликата била реставрирана.
Оваа слика е реставрирана најмалку 25 пати, но „Операција Ноќна стража“ ќе биде најопсежното истражување досега.
Линкот каде што можеш да ја следиш реставрацијата на Ноќна стража: https://www.rijksmuseum.nl/en/nightwatch