Светот на уметноста и инспирација

Најскапите слики во светот

Дали знаеш кои слики се наоѓаат на листата на најскапо продадени уметнички дела?
Подготви се за вртоглави суми!

Играчи на карти - Пол Сезан
Стана најскапата слика во светот откако беше продадена за 250 милиони долари. Сликата ја купи кралската династија на Катар, која според експертите е еден од најголемите купувачи на светскиот пазар на уметнички дела.

Број 5 - Џексон Полок
Беше продадена за рекордни 140 милиони долари. Интересно е што купувачот на ова дело не ни е познат, но кружат шпекулации дека тоа би можело да биде мексиканскиот претприемач Дејвид Мартинез.

Жена III - Вилем де Кунинг
Беше проценета на 137,5 милиони долари. Купувач на овој портрет од средината на 20-тиот век е Стивен Коен.

Адел Блох-Бауер I - Густав Климт
Овој портрет беше продаден за 135 милиони долари во 2006 година на Роналд Лаудер и сега ја краси неговата галерија во Њујорк.

Крик - Едвард Мунк
Претставува фигура што вреска на позадина од крваво црвено небо. Неодамна беше продадена на непознат купувач за неверојатни 119,9 милиони долари.

Акт, зелени лисја и биста - Пабло Пикасо
Оваа слика беше продадена на аукција во Њујорк во 2010 година за 106,5 милиони долари. Претставува портрет на љубовницата и муза на Пикасо, Мари-Терез Валтер, од 1932 година. Патем, во топ 10 најскапо продадени слики се наоѓаат уште две дела на Пикасо: "Момче со луле" и "Дора Мар со мачка".

Иако за уметноста често велиме дека е бесценета, пазарот на уметнички дела сепак ја одредува нејзината вредност во милиони. Ретко кој уметник доживеал неговите дела да достигнат вакви астрономски цени уште за време на неговиот живот.