Светот на уметноста и инспирација
Ефект на 'рѓа – некогаш непожелен, сега добредојден ефект
Тешко е да имаш какви било позитивни чувства кога ќе помислиш на 'рѓа. Не е добро кога ќе се појави на некоја површина, тешко се отстранува, а сигурно не е добро ниту да се каже за некој човек дека „зарѓал“. Сепак, во сите аспекти на човековата дејност е сосема нормално нешто што во еден период се смета за грдо, во следната фаза да стане – нешто најубаво. Перспективата од која набљудуваме нешто е многу важна, а самата дефиниција за убавината вели дека таа се наоѓа во окото на набљудувачот и дека тој одлучува за неа, а не самиот изглед на предметот. Тоа е веројатно причината зошто нашите мислења за тоа што е убаво постојано се менуваат.
Во последно време, особено со растот на популарноста на техниката декупаж, повторно исплива на површина нашата љубов кон минатото, па со тоа и предметите кои изгледаат како да потекнуваат од дамнешни времиња, покриени со слој патина и како да сме ги наследиле од баба ни, се многу омилени и популарни. Заедно со нив, на сцена стапува и 'рѓата како јасен знак за староста на предметот.
Исто како што најдовме начини на новите предмети да им додадеме патина, така најдовме и начин предметите да изгледаат како да се покриени со 'рѓа, и сето тоа без нејзините непријатни аспекти, како што е мирисот.
Ако се нурнете во набљудувањето на самата 'рѓа и за момент заборавите на нејзините негативни последици, ќе забележите дека нијансите што ги создава се меѓу најубавите во природата, а производите со ефект на 'рѓа многу успешно ја имитираат природата.
Pentart, производителот на одлични хоби алатки, се погрижи да имате избор на производи кои можете да ги користите за создавање ефект на зарѓана површина. Тоа се: Течна 'рѓа, Прав со ефект на 'рѓа, Реагенси со ефект на 'рѓа и Акрилни бои со овој ефект. Кој најмногу ви одговара, можете сами да изберете, а добро е да знаете дека апликацијата на сите е подеднакво едноставна, иако можеби не би се рекло така според нивните имиња или врз основа на ефектот што треба да го создадат.
Течна 'рѓа
Течната 'рѓа е спакувана во шишенце од 20 ml, кое на врвот има апликатор за капење, за полесно да можете да ја користите. Има примена главно кај сликарите, бидејќи е идеална за создавање ефект на 'рѓа на платно, особено кај современите сликари кои колажираат метални предмети на платното, како што се жица или лименки.
Ако сакате да постигнете ефект како предметите на платното (или на која било друга површина) да се покриени со 'рѓа, прво нанесете со широка четка светла акрилна боја или дури и специјална бела акрилна боја за подлога, а потоа на површината додајте ги предметите што сакате да ги „зарѓосате“.
Накапете врз нив течна 'рѓа и набљудувајте како се создава ефектот. Оставете ја површината исправена и речиси вертикална, за 'рѓата да се појави на самиот предмет, но и околу него. По 24 часа, површината ќе биде целосно сува.
Прав со ефект на 'рѓа
Правот со ефект на 'рѓа можете да го користите во комбинација со кој било производ што има структура на паста, или во комбинација со реагенси. Правот измешајте го во приближно ист сооднос со пастата. Смесата не мора да биде хомогена, и можете да ги мешате во сад или директно на површината на која работите. Кога доволно ќе ги измешате со помош на шпатула, рамномерно размачкајте ги по целата површина. Ако сакате посилен ефект, можете да додадете уште.