Новости и заедница

Дали контурите можат да се користат и на платно?

Меѓу сликарските и хоби боите ќе најдете и контури – туби или шишенца во кои се наоѓа боја, а кои имаат апликатор, односно врв кој е подолг и значително потесен од оној на класичните туби со боја. Овие производи главно се вбројуваат меѓу хоби материјалите бидејќи најчесто се користат при сликање на стакло или при сликање на текстил (особено свила), но постојат и универзални варијанти кои можете да ги користите на речиси сите материјали. Добивме прашање дали можат да се користат и во сликарството и дали можат да се комбинираат со акрилни и маслени бои. Одговорот е – да.

Универзалните контури се на акрилна база, така што можете слободно да ги нанесувате и на платно кое е подготвено за работа со акрилни бои, а секако и на хартија или картон. Сликарите ги користат за да го нагласат цртежот или многу често за на својата слика нешто да напишат со оној фин, елегантен фонт. Со оваа „алатка“ можете да постигнете сосема поинаква трага од онаа што ја добивате со четки или сликарски шпатули – полна, релјефна линија.

Освен контурите кои веќе имаат боја во себе, можете да пронајдете и празни контури. Тие се користат така што бојата ја истурате во шишенцето (во зависност од тоа дали сакате трагата благо да се разлее или да остане цврста, јасна линија, можете бојата да ја разредите со вода или да ја згуснете така што ќе ѝ додадете акрилен гел, на пример) и ја користите на ист начин. За оваа цел можете да користите дури и слаткарски кеси кои имаат облик на триаголник и се направени од поцврста фолија, но со контур шишенцата тоа оди многу полесно бидејќи во раката можете да ги држите речиси како пенкало, а со благ притисок бојата излегува.

Дали акрилните бои можат да се користат за сликање по лице и тело?

Повремено се среќаваме со прашањето дали акрилните бои можат да се користат на лице или на кожа воопшто. Со оглед на тоа што „body painting“ станува сè попопуларен, а повеќето детски роденденски забави не поминуваат без сликање по лице, мислиме дека е важно да ве потсетиме на тоа дека акрилните бои не се наменети за сликање по тело. Вистина е дека тоа би бил многу успешен и ефектен проект, но нашиот совет е на својата кожа да користите исклучиво бои кои се направени за таа намена. За среќа, денес ги има и можете многу лесно да ги најдете во продажба – како бои за лице.

Акрилните бои можат да содржат состојки кои се штетни по вашата кожа и вашиот организам ако ги користите на таков начин (во поголема количина нанесувате на кожа и оставате на неа подолг временски период). Секако, немојте сега да помислите дека морате строго да внимавате акрилната боја да не дојде во допир со вашата кожа додека сликате – тоа е мала количина на боја и кратко ќе се задржи на вашите раце (каде кожата не е чувствителна како на лицето, на пример).

Како да се згусне маслената боја?

Често прашање. Маслените бои се инаку значително погусти од стандардните акрилни бои и уметниците немаат толку често потреба дополнително да ги згуснуваат, па тоа е веројатно причината зошто на пазарот постојат многу повеќе производи за згуснување на акрилни отколку на маслени бои.

Просечната маслена боја, кога ќе ја истиснете од тубата и ќе ја нанесете со шпатула на платно, ќе ја задржи формата – нема да се разлее како што би се случило со акрилната боја. Исто така, кога со неразредена маслена боја ќе повлечете потез на платното, ќе остане видлива трага од четката. Меѓутоа, ако сепак повремено ви затреба дополнителна густина, можете да се послужите со трикот неколку часа пред сликањето бојата да ја истиснете на картон и да ја оставите така – картонот ќе го впие маслото од бојата и со самото тоа бојата ќе стане за нијанса погуста. Во маслената боја можете да додавате прашкасти материи како мермерен прав или ситен песок и каолин, или можете да ја измешате со транспарентна восочна паста. Но, немојте да заборавите дека тоа сè ќе ја промени бојата, покривноста и дека на бојата ќе ѝ го одземе сјајот.

Дали пастелот може да се користи за цртеж преку маслени бои?

Одличен пристап. Ако не сте знаеле, професионалците прилично често комбинираат на течни бои и суви бои како пастели. Секако, неопходно е слојот на боја преку кој цртате да биде целосно сув и да користите маслени пастели. Преку цртеж со маслени пастели секогаш можете повторно да работите со маслени бои, но немојте да практикувате акрилна боја да нанесувате преку таков цртеж бидејќи, освен што бојата нема убаво да се „фати“, може да дојде подоцна и до лупење на тие слоеви.

На овој начин можете да ги ублажувате и сокривате преодите помеѓу различните нијанси на сликата, а можете со контрастна боја на пастел да го засилите цртежот. Маслените пастели нанесени преку сува маслена боја можат да го намалат сјајот или да го изедначат на деловите каде не сте задоволни како изгледа.

Дали и како може да се користи течен метал во сликарството?

Освен што можете да го користите во различни декорации, како дополнување на декупаж или слични техники, течниот метал е производ кој можете да го користите и на слики на платно, хартија или картон. Се работи за производ кој е на база на разредувач и во себе содржи посебно ситен метален пигмент, па кога ќе го нанесете на површината тој навистина изгледа како метал. Повеќе брендови го произведуваат и тоа во повеќе нијанси, па ќе најдете сребрена, златна, старо злато, бронзена или бакарна нијанса.

Она за што морате да водите сметка е фактот дека е на база на растворувачи и дека би требало да го нанесувате исклучиво преку површини кои се премачкани со подготвителен слој (гесо, прајмер), а кога по сушењето посакате да го лакирате делото, исто така е важно тоа никако да не го правите со акрилен лак, туку да одберете лакови на база на растворувачи. Посебно интересен впечаток оставаат оние делови на сликата кои имаат изразен релјеф, бидејќи кога ќе ги премачкате со течен метал, поради прекршувањето на светлината релјефот станува уште повидлив.