DIY и креативни проекти

Декупаж, од францускиот збор decouper – сечење, отсекување

Декупажот е хоби техника при која, едноставно кажано, се сечат салфетки, оризова хартија со принт или слични видови тенка хартија, кои потоа се лепат на подлогата за да се украси.

Освен основните материјали како салфетки и лепило, во декупажот често се користат и:
- акрилна боја
- пасти со специјални ефекти
- лакови кои предизвикуваат пукање и даваат антички изглед
- ситни предмети кои на крајот може да се залепат, како што се пердуви, бисери, светки
- но и доцртување на одредени детали...

Подлога

Декупажот може да се прави на различни подлоги:
- дрво
- пластика
- стакло
- метал
- керамика
- но и на текстил...

Но, секоја од овие подлоги бара подготовка! Најважно е предметите да бидат чисти и суви, без прашина и маснотии (исчистени со алкохол), а текстилот треба да се испере и исуши без омекнувач. Препарат / гесо – производ на акрилна база, со бела боја, кој се нанесува на предметот пред акрилната боја.

Акрилни бои и лепило

Со акрилна боја се бои предметот на кој ќе се лепат салфетките, иако салфетките може да се лепат и директно на предметот ако е со светла боја. Како лепило се користи специјално лепило за декупаж, кое по сушењето станува целосно проѕирно, што е важно бидејќи самите салфетки се провидни и многу нежни. По лепењето на салфетките и сушењето на лепилото, може да се користат акрилни бои за доцртување на детали или за маскирање на преодите и рабовите.

Завршен лак

Како и секоја ракотворина, така и декупажот бара соодветна заштита за да трае подолго., особено ако станува збор за предмети што се користат секојдневно. Понекогаш, покрај производите на акрилна база, се користат производи како восочни пасти или производи на база на растворувачи, затоа е неопходно да се внимава каков завршен лак се користи:
- акрилен лак за дела изработени само со акрилни производи
- лак на база на растворувачи за производи со различни бази

Дали и вие сте љубители на декупажот? Споделете ги вашите креации со нас!