Цртање и илустрација

Тоа е повеќе од обичен блок за цртање. Замисли си гардеробер, поткровје, подрум или фиока во која се чуваат твоите случајни мисли испреплетени со секојдневните доживувања. Скица блокот (sketchbook) е начин за обработка на „сурови“ искуства.

"Тоа е љубов и зависност во еден блок хартија."

Слобода и чистота на мислите кои штотуку извираат, го чувствуваш ли тоа? Благодарение на скица блокот, можеш да ги фатиш токму онака како што доаѓаат. Блоковите за скицирање се како твој личен дневник, во кој ги запишуваш своите чувства, експериментираш со идеи и го документираш светот околу себе. Оваа идеја многу ме инспирираше, па затоа подготвив неколку совети како да започнеш со свој сопствен скица блок и зошто вреди да си набавиш еден:

1. Дозволи си блок и прибор во кои ќе се заљубиш

При изборот на вистинскиот скица блок, размисли за тоа како и кога ќе сакаш да го користиш. Еден од најлесните начини да се осигураш дека ќе го отвораш секој ден е да го имаш постојано со себе.

Кога ќе се појави мисла или слика, можеш веднаш да ги забележиш на хартија. Поради ова, скица блок со поголеми димензии и тежина нема да биде најдобар избор. Сметај на тоа дека може да создадеш убава колекција на скица блокови, на кои со љубов ќе им се навраќаш.

Во овие блокови најчесто се црта со молив или пенкало, но не плаши се да експериментираш и со нови медиуми.

Модерните блокови хартија имаат ознака „mixed media“, што значи дека се идеални и за сликање со акварелни бои, мастила или уметнички пенкала.

Создавај колажи, обиди се во чантата да спакуваш и неколку практични акварелни маркери или четка со резервоар за вода. Во секој потег шепоти, но истовремено и викај. Тоа е твоја книга, твој простор, твој свет.

2. Не плаши се да правиш грешки

Како што рече познатиот американски сликар Боб Рос, не постојат грешки, само мали среќни незгоди. Еден од најтешките предизвици што мораш да ги надминеш кога водиш дневен скица блок е да ги отфрлиш очекувањата дека секоја страница ќе биде совршено дело. Во уметничкиот свет постојат многу книги - скица блокови на уметници, кои често се дури и високо ценети.

Скица блокот ти всадува чувство дека совршенството не е важно.

Со тоа што не се фокусираш целосно на прецизноста на линиите, како при сликање на сликарско платно, го губиш стресот поврзан со формата и имаш можност повеќе да се фокусираш на содржината и да ја почувствуваш мислата што ти дошла. Поради тоа, скица блокот е идеален за сликари почетници. Тој е место за игра и експерименти.

Ако од некоја скица се чувствуваш особено фрустрирано, едноставно ослободи се од неа и искини ја страницата, или обиди се повторно веднаш до оригиналната скица. Запомни дека скица блокот нема правила - освен кинење, можеш неуспешната скица да ја вклопиш во колаж на друга страница, да ја пресликаш или хартијата да ја свиткаш како оригами.

3. Користи набљудување и имагинација

Уметниците обично водат скица блок поради две причини

За да го забележат светот околу нив или за да ги фатат мислите на хартија. Најголемото чудо сепак настанува кога ќе се сретнат овие два света.

На пример, ако си уметник кој обично скицира фигури, можеби би сакал да ја испробаш т.н. слепа контура (blind contour drawing) - техника при која црташ објект што го набљудуваш, без да гледаш во хартијата и без да го креваш моливот, четката или друг алат, сè додека сликата не е готова.

Оваа вежба може да ти помогне да ја скршиш вообичаената рутина и да произведеш неочекувани слики. Резултатните цртежи обично се слободни, нелогични и малку хаотични.

Ако, пак, често сликаш ентериери, обиди се да го нацрташ истиот простор по втор пат, но од нов агол. Оваа вежба ќе те научи да ја перцепираш тродимензионалноста на предметот наместо рамната слика што ја замислуваш во главата.

Можеби имаш чувство дека за време на цртањето чувствуваш досада и е време за нешто невообичаено. Во тој случај испробај го ова: Собирај слики од различни извори; интуитивно избери ги оние што те интересираат. Залепи ги во својот скица дневник, сликај, цртај и вклопувај ги во страниците на својот свет на фантазијата. Така ќе настане нов универзум, во кој можат заедно да постојат различни фрагменти од секој ден. Сигурна сум дека ќе создадеш нешто неочекувано.

4. Користи го скица блокот наместо фотоапарат

Знаеш ли дека во Бруклин постои библиотека во која ќе најдеш над 41 000 скица блокови? Замисли си дека прелистуваш цртежи кои некој ги скицирал за време на одмор, и ти преку нив црпиш одлични совети за патување. За еден патник, скица блокот може драматично да ги зголеми деталите за околината каде што се упатува и да ги открие најдобрите работи што вреди да се видат и во живо.

Да си спакуваш скицар на одмор е илјада пати подобра идеја од тоа да земеш фотоапарат. Тоа е така затоа што цртањето или сликањето ти одзема време додека го доловиш сè она што се протега пред тебе.

Тоа е главната разлика помеѓу тоа да бидеш на некое место или само брзо да „шкрапнеш“ со апаратот и веднаш да продолжиш понатаму. Кога ќе одвоиш време и ќе се загледаш во убавината на дестинацијата со пенкало или молив во рака, почнуваш да забележуваш детали што инаку би ги пропуштил. Исто така, цртањето ќе ти помогне уште подлабоко да го запаметиш патувањето и да уживаш во него максимално.

5. Скицарот е твојот најблизок пријател

Покрај патничките скицари, популарни се и проектите со скицари. Тие често изразуваат поврзаност со починати, сакани личности или со некој со кој уметникот изгубил контакт и копнее по повторно поврзување. Тоа е како приватна терапија, а секоја страница е полна со чувства и мисли со кои полесно можеш да се справиш.

Освен тоа, скицарите можат да бидат корисни и во стресни ситуации, како јавни настани, непријатни случки или телефонски разговори. Тие помагаат да ги пренесеш чувствата на хартија и да го исфрлиш притисокот, со што повторно се воспоставува хармонија.

Скицарот е тука за да го долови твојот живот како дневник. Може да биде твој верен сопатник на патувањата или со љубов да те чека дома по напорниот ден. Кога размислувам за овој начин на творење, ми паѓа на ум само едно прашање: Како е можно сè уште да немам скицар? Уште утре морам да си набавам еден! :)

Ви посакувам многу секојдневна инспирација

Ингрид