Цртање и илустрација

За цртање е доволно да имате само хартија и молив — тоа е точно, меѓутоа, имавме можност да ѕиркаме во ателјето каде што настануваат цртежите и во приборот или во футролата за моливи на еден сериозен сликар кому основен начин на изразување му е токму цртежот. Освен големиот број моливи со различна тврдина и класична гума, таму затекнавме уште неколку помалку вообичаени ситници. Ви ја пренесуваме листата со 4 работи што се нашле таму, а за кои уметникот тврди дека му се неопходни за да постигне богат тонски распон и длабочина на цртежот.

Мека гума

Гумата за бришење не е само средство со кое ќе ја избришете грешката од цртежот, туку и начин да извлечете бели линии од површини што се веќе заситени со графит или јаглен, со други зборови — да работите во негатив. И затоа, освен што би требало во својот прибор да имате бела — винил гума, сигурни сме дека од корист ќе ви биде и мека гума (гнет/гњечлива гума) па ве советуваме да си ја обезбедите и да ги испробате нејзините можности.

Бидејќи станува збор за мека и леплива гума, од неа лесно ќе обликувате токму таква гума каква што ви е потребна за да ја отстраните јагленовата прашина или графитот од хартијата. Нема да се рони по цртежот, ниту е премногу силна за да ја скине хартијата при чести корекции, па е одлична за почетници и ученици. Едноставно обликувајте од неа тенок врв и искористете го за да извлечете тенки бели линии, да ги ублажите сенките со тапкање на гумата по површината или да направите суптилни премини.

Хартиен стап за сенчење

Хартиениот стап за сенчење не е ништо друго освен порозна хартија што е така свиткана што од неа е направен цел молив. Со него не можете да оставите трага, но можете да ја ублажите линијата што сте ја направиле со мек (B) молив или јаглен.

Ќе забележите дека некои цртачи го размачкуваат графитот со прсти. Тоа никако не е добра идеја — освен што не изгледа добро и понекогаш личи на случајно размачкана површина, многу лесно може да ви се случи поради маснотијата од прстите на хартијата да се појават дамки што нема да ги избришете со ниту една гума. Освен хартиен стап, за размачкување можете да користите крпчиња од памук или еленска кожа.

Графит во различни облици

Она по што морате да ги разликувате графитите е тврдината — во зависност од количината на глина во графитното срце, тој ќе остава посветла или потемна трага. Моливите со ознака H имаат потврди и посветли графити, додека оние со ознака B оставаат помека и потемна трага. Уште една, многу повидлива разлика е обликот на графитот — можете да најдете моливи како стандардни дрвени, можете да најдете лакирани моливи што се цели од графит, или графити во квадратен облик, на пример.

Ако сте се прашувале дали воопшто некој ги користи оние големи, чудни графити со квадратен облик — да, и тоа како. Цртачите тврдат дека со класичните моливи со тенки графитни јадра не можат да ги реализираат сите идеи што ги имаат, или барем не можат да ги реализираат толку брзо. Нив можете да ги користите како што ќе ви падне на памет, можете да осенчите голема површина само со еден потег на положениот четвртаст графит или со рабовите да добиете исклучително тенки линии.

Фиксатив во спреј како помош и за време на цртањето

За фиксативот во спреј сигурно знаете како за нешто со кое на крајот можете да го заштитите своето дело од размачкување. Неопходен е ако на цртежот сте користеле природен или вештачки јаглен, но и ако сте користеле меки моливи бидејќи и тие имаат тенденција лесно да се размачкаат ако цртежот го ставите во папка или често го покажувате.

Искористете го фиксативот како помош и за време на самото цртање — ќе забележите дека при работа со природен јаглен повремено доаѓа до заситување на хартијата, па не можете да постигнете доволно темни вредности. Во такви случаи испрскајте ја проблематичната површина со фиксатив, почекајте да се исуши и таа повторно ќе биде порозна и добра за доработување на цртежот. Исто така, ако не сте особено внимателни за време на работата па ви се случува со дланката да размачкувате делови од цртежот, можете партиите што се речиси завршени да ги испрскате со фиксатив и така да ги заштитите од оштетување. Фиксативот секогаш нанесувајте го од оддалеченост од барем 50 см и во тенки слоеви — секогаш е подобро да нанесете повеќе тенки слоеви оставајќи ја хартијата да се исуши пред нанесување на секој нареден.